NAGHAIN si Senadora Nancy Binay ng Ethics Complaint sa Senate Committee on Ethics laban kay Senador Alan Peter Cayetano kaugnay sa naganap insidente sa  pagdinig noong nakaraang linggo ng Senate Committee on Accounts ukol sa New Senate Building (NSB).

Batay sa labing limang pahinang inihaing reklamo ni Binay nakasaad dito ang naramdamang pambabastos at ginawang pagtrato sa kanya ni Cayetano noong siya ay dumalo sa nabanggit na pagdinig.

Halos maluha din si Binay ng siya ay makapanayam ng media matapos ang kanyang paghahain ng reklamo laban sa kanyang kapwa senador.

Samantala umaasa naman si Cayetano na mababalewala lamang ang reklamong inihain sa kanya ni Binay na lalo na’t hindi naman ito ang tunay na isyu kundi ang usapin ng NSB ang dapat na resolbahin.

Nanindigan din si Cayetano na kung karapatan ni Binay na maghain ng reklamo sa ethics committee ay mayroon din siyang karapatang maghain.

Aminado si Cayetano na kung naramdaman ni Binay na siya ay nabastos ay siya din bilang Chairman ng Committee ay nabastos din siya sa ginawang pananalita at hakbangin ni Binay sa pagdalo sa komite.

Sa huli ay pareho namang sumang-ayon ang dalawang senador na maari pa din naman silang magpatawaran sa isat-isa kung talagang makapag-uusap lamang sila ng mahinahon at maayos.

Ngunit sinabi ni Cayetano na kung nais makapag-usap ni Binay dapat ito ay kaharap ang lahat at sa publiko upang sa ganoon ay walang maisip ang taong bayan na mayroong tinatago sa naturang usapan.

Naninidigan din si Cayetano na wala siyang inaakusahang mayroong korupsyon at hindi niya target si Binay kundi nais lamang nilang maipaliwanag ng Department of Public Works and Highways (DPWH) kung bakit umabot sa 23 bilyong piso na ang nagagastos sa NSB.

Nanawagan din si Cayetano kaya Binay na kung nais nitong dumalo sa pagdinig at humingi ng ilang oras at minuto para magsalaita o magtanong ay kanyang papayagan.

Tinukoy din ni Cayetano na hindi na bago ang naganap na insidente sa pagitan nila ni Binay dahil noon pa man ay mayroon na ding katulad na pangyayarai.

 (PNA photo by Avito Dalan)