Ang PEOPLES’ POWER ay karapatan ng mga mamayan na umalsa laban sa isang gobyernong hindi na tumutugon sa kanilang interes. Sa pilosopiyang pampolitika, ang karapatan sa rebolusyon (o karapatan sa pag-aalsa) ay ang karapatan o tungkulin ng mga tao na “baguhin o buwagin” ang isang pamahalaan na kumikilos laban sa kanilang karaniwang interes o nagbabanta sa kaligtasan ng bayan nang walang makatarungang dahilan.

Pero kung ang isang pagaalsa ay para lang protektahan ang interes ng isang tao o isa o iilang pamilya ay malayong dapat ituring na lehitimong pagsasagawa ng karapatan ng mamayan sa pag-alsa ito.

Ganito ang nangyayari ngayon sa Davao City.

Nagprotesta ang mga tagasuporta ni Pastor Apollo Quiboloy ng Kingdom of Jesus Christ (KOJC) sa labas ng kanilang compound, na nauwi sa tensyon sa pagitan nila at ng mga pulis. Nagsimula nang mapayapa ang kilos-protesta ngunit lumala nang harangan ng mga nagpoprotesta ang diversion road patungong Davao Airport, na nagdulot ng matinding trapiko.

Nagsimula ang kaguluhan nang subukang iligtas ng mga pulis ang mga umano’y biktima ng human trafficking sa loob ng KOJC compound. Tumutol ang mga tagasunod ni Quiboloy, na nagresulta sa sagupaan sa pagitan nila at ng mga awtoridad. Nanawagan ang Commission on Human Rights (CHR) na iwasan ang karahasan at igalang ang batas. Samantala, hinikayat ni Senador Ronald “Bato” dela Rosa si Quiboloy na sumuko, sa pagsasabing, “Hindi ka maaaring magtago habangbuhay.” Patuloy na nagiging alanganin ang sitwasyon sa lungsod.

Si Pastor Apollo Quiboloy, lider ng Kingdom of Jesus Christ, ay nahaharap sa mga seryosong kaso kabilang ang human trafficking, kasong sexual exploitation, at paglabag sa mga batas ng Estados Unidos kaugnay ng money laundering at wire fraud. Ang mga paratang na ito ang naging batayan ng mga subpoena at warrant of arrest laban sa kanya, at patuloy siyang hinahanap ng mga awtoridad sa iba’t ibang bansa.

Hindi ‘People Power’ ang nangyayari sa Davao. Gusto niyo bang makakita ng tunay na ‘People Power’ ngayon? Dapat iyon ay magpaalis ng tuluyan sa parehong “puwersa ng kadiliman at puwersa ng kasamaan”. Ganito lang ang nangyayari sa Davao City ngayon. Paglalaban ng puwersa ng kadiliman sa puwersa ng kasamaan. Hindi ito laban ng boung sambayanan.

Ang pagtatanggol sa isang umano’y sexual abuser at human trafficker ay HINDI ‘PEOPLE POWER’! Hindi ito dapat sinusuportahan! Isa itong insulto sa tunay na kahulugan ng ‘People Power’!