Enerhiya ng Kinabukasan? Panawagan para sa Nuclear sa Gitna ng Bagyong Kalikasan

Ni: Chit Luna

Makati City, Pilipinas – Sa harap ng sunud-sunod na bagyo na tumama sa bansa nitong huling mga buwan, muling nanawagan ang Alpas Pinas, isang non-stock at non-profit na organisasyon, na bigyang-pansin ang nuclear energy bilang solusyon sa lumalalang hamon ng klima sa Pilipinas. Ang organisasyon ay naniniwala na ang nuclear energy ang susi sa mas malinis, murang, at maaasahang pinagkukunan ng kuryente.

Simula Oktubre, anim na bagyo na ang nanalasa sa bansa, na nagdulot ng matinding pinsala sa milyon-milyong Pilipino. Ang Severe Tropical Storm Kristine noong Oktubre 23-25 ay umapekto sa mahigit 3.3 milyong tao at kumitil ng hindi bababa sa 150 buhay. Kasunod nito, ang Super Typhoon Leon ay nagdulot ng matinding pagbaha, lalo na sa Batanes, at nagdulot pa ng karagdagang mga nasawi.

Sunod-sunod pang tumama ang Typhoon Marce, Nika, Ofel, at Pepito noong Nobyembre, na nagresulta sa malawakang paglikas at pagkawasak ng kabuhayan. Sa gitna ng mga kalamidad na ito, iginiit ng Alpas Pinas na oras na para yakapin ang nuclear energy upang labanan ang sanhi at epekto ng pagbabago ng klima.

“Nuclear energy ay hindi lamang isang malinis na pinagkukunan ng enerhiya; ito ang daan para sa mas matatag at abot-kayang hinaharap ng enerhiya para sa Pilipinas,” ani Gayle Certeza, Lead Convenor ng Alpas Pinas. Binigyang-diin niya na ang paggamit ng nuclear power ay maaaring magbawas ng pagsusunog ng karbon na pangunahing sanhi ng carbon emissions at pagbabago ng klima.

Ayon kay Certeza, mahalaga ang nuclear energy sa pagpapalakas ng energy grid ng bansa, lalo’t hindi palaging maaasahan ang solar at wind energy. Ang nuclear power ay walang greenhouse gas emissions at maaaring magbigay ng mas mahabang panahon ng supply ng kuryente kahit sa gitna ng matitinding bagyo.

Sumuporta rin si Pangasinan 2nd District Representative Mark Cojuangco sa panawagang ito, na matagal nang nagtutulak sa integrasyon ng nuclear power sa energy mix ng bansa. Aniya, “Ngayon ang tamang panahon para kilalanin ng gobyerno ang benepisyo ng nuclear energy, hindi lang sa kalikasan kundi pati na rin sa ekonomiya.”

Idiniin ni Cojuangco na ang nuclear energy ay magpapababa sa presyo ng kuryente at magtitiyak ng mas matatag na sektor ng enerhiya sa bansa. Dagdag pa niya, “Hindi ka maaaring maging tunay na environmentalist kung hindi mo tinutulak ang nuclear energy.”

Habang tumitindi ang mga banta ng natural na sakuna at kakulangan sa enerhiya, nananatiling matatag ang Alpas Pinas sa kanilang panawagan. Naniniwala silang dapat seryosohin ng mga mambabatas ang paggamit ng nuclear energy upang masolusyunan ang krisis sa enerhiya at pagtibayin ang kakayahan ng bansa laban sa epekto ng pagbabago ng klima.

“Sa pagsulong ng nuclear energy, binubuksan natin ang pintuan para sa mas abot-kayang kuryente, mas matatag na negosyo, at mas ligtas na kinabukasan,” pagtatapos ni Certeza. “Panahon na upang magsagawa ng matapang na hakbang patungo sa mas malinis at mas napapanatiling enerhiya para sa lahat ng Pilipino.”